Di çerçoveya konsepta Hevpeymana Şengal a ku bi erêkirina DYA û daxwaza deweleta Tirk a dagirker di navbêra rêveberiya navendî ya Irak û PDK’ê çêbû de, PDK ku ji bo teslîmgirtina rêveberiya xweser a Şengalê serî li hemû lîstikan dide, ev car jî xwest şensê xwe di ser Serokê Bloka Êzidî Nayîf Xelef Seydo de biceribîne.
Bi taybetî di demên dawî de di mijara çarenûsa gelê Kurd ên Başûrê Kurdistanê gelek hevpeymanên veşartî tên kirin, yek ji van jî li ser daxwaza dewleta Tirk a dagirker û di bin serweriya PDK’ê de Serokê Bloka Êzidî Nayîf Xelef Seydo, bi rayedareke payebilind a Iraqê re li Misulê hevdîtinek kiriye û hevpeymaneke veşartî pêkanîne.
EWLEKARIYA ŞENGALÊ RADESTÊ ARTÊŞA IRAQÊ ÎDAREYA HÛNDIR JÎ BIDIN PDK’Ê
Di aliyekê de dewleta Tirk a dagirker li Başûrê Kurdistanê bi operasyonan di hêla leşkerî de hema bêje heya navendên bajaran biryargeh û navendan ava kiriye, di aliyê din de jî di xeta Misul-Kerkûkê ber bi jor ve artêşa Iraqê xistiye bin serweriya xwe û bi tevlîkirina PDK’ê dixwazin hemû deskeftiyên gelê Kurd di çerçoveya hevpeymanên veşartî berteraf bikin. Di vê çerçoveyî de Nayîf Xelef Seydo ku wek alîgirê PDK’ê tê nasîn li Misûlê bi rayedarên payebilind ên Iraqê re hevdîtin kiriye û di encama hevdîtinê de ev biryar hatine girtin; hemû ewlekariya derve û hûndir a Şengalê radestê artêş û polîsên navenda Iraqê bên kirin û karên hûndirîn ango îdarî jî teslîmê PDK’ê were kirin. Hat diyarkirin ku di çerçoveya vê hevpeymana veşartî de dibe ku li dijî rêveberiya xweser a Şengalê operasyonek nû were kirin û beriya wê jî ji bo zemîna ve êrîşê jî dê ji aliyê kesên nêzî Xelef Seydo ve propagandaya wê bê kirin.