Eşkere bû ku PDK’a ku bi awayekî aktîf destekê dide dagirkeriya dewleta Tirk a li ser Başûrê Kurdistanê û Rojava, planeke qirêj a nû li hewldanên xwe yên meşrûkirina dagirkeriyê zêde kiriye. PDK di çarçoveya senaryoyeke nû de bi fermana MÎT’ê şandina hêzên xwe yên li Herêmên Parastinê yên Medyayê di bin navê û ala Iraqê de didomîne.
Tevî rexne û hişyariyên pêşengên Tevgera Azadiya Civaka Kurd û tevahiya gelê Kurd, careke din hate îspatkirin ku PDK ya ku her cure derfetên îstîxbaratî, lojîstîk, ewlekarî, stargeh û veguhestinê dide dewleta Tirk a dagirker rasterast bi vê planê tevlî şer dibe. Ji ber ku dewleta Tirk di çarçoveya plana navborî de hêzên di bin nav û ala Iraqê de şandiye hin cihên krîtîk ku nikare bikeveyê, ji aliyê gelê herêmê bi taybet Amediye û Bradostê ve bû sedema bertekên mezin.
BI HÊZÊN 80. DI BIN NAV Û ALA IRAQÊ DE PIŞTGIRIYA TAM DIDE
Hate diyarkirin ku dema pêşmergeyên PDK’ê bi ala Iraqê li ser sînor liv û tevgera xwe didomînin, bi ala Iraqê û li ser navê nobedarên sînor ên hêzên Hêza 80’an ku ti Ereb tê de nebûne hêz şandine Herêmên Parastinê yên Medyayê. Hate diyarkirin ku PDK’ê ku beriya niha hêzên xwe yên taybet Zêrewan, Gulan û çeteyên Roj li hemû cihên ku dewleta Tirk a dagirker nikarîbû bikeve bi cih kiribû, vê carê jî hêza 80’emîn ku 58 hezar pêşmerge di nav de ne, di çarçoveya plana ku bi hilberîna MÎT’ê re çêkiribû de di bin ala Iraqê de û li ser navê nobedarên sînor şandin Herêmên Parastinê yên Medyayê.
Derket holê ku PDK’ê bi fermana MÎT’ê xwestiye şerê PDK û PKK’ê ji çarçoveya vê planê derxîne û bi tevahiya Iraq û Herêma Kurdistanê ve girêbide. Her wiha hate gotin ku PDK’ê ji bo êrîş û têkiliyên xwe yên qirêj a bi dewleta Tirk a dagirker re veşêre hemû rê û rêbazan bikar tîne.
Di nava 2 mehan de dewleta Tirk a dagirker li Iraq û Herêma Kurdistanê gelek civîn li pey hev pêk anîn. Li gel serdana Musteşarê MÎT’ê Îbrahîm Kalin, Wezîrê Karên Derve yê hikûmeta şer a AKP-MHP’ê Hakan Fîdan û Wezîrê Parastinê Yaşar Guler ên ji bo Iraq û Herêma Kurdistanê, Serokê Giştî yê Heşd El Şeebî Falih Feyyad jî serdana Enqereyê kir.
ÎRAN JI VÊ LÎSTÎKA QIRÊJ ACIZ E
Stratejî û siyaseta dewleta Tirk a dagirker a gihandina sînorên Mîsakî Millî, dewleta Îranê ya ku li herêmê têkoşîneke hegemonîk dimeşîne bêzar dike. Rejîma Îranê, hewildana dewleta Tirk a dagirker ku welatekî NATO’yê ye, bi piştgiriya PDK’ê ya hevkar dixwaze dagiriya xwe ya heremê berfireh bike weke metirsî dibîne. Weke ku tê zanîn di van salên dawî de, di encama daxwazên berdewam ên PDK’ê de, DYA’yê hêzên xwe yên leşkerî ku ji Iraqê vekişandibû, li Başûrê Kurdistanê bi cih kir. Amerîka hebûna xwe ya leşkerî li Başûrê Kurdistanê zêde kiriye û bihêz kiriye. Her wiha PDK’ê, ya dewleta Tirk a dagirker ku welatê NATO’yê ye li ser sînorên Başûrê Kurdistanê veguherand hêzeke bi bandor. MÎT, CIA û MOSSAD li her derê rêxistinkirî ne û bi Parastin re tevdigerin. Îran van geşedanan hemûyan li hember stratejiya xwe ya Hîlala Şîa neyînî dibîne. Eşkere ye ku Îran bihêzbûna DYA, dewleta Tirk a dagirker û Îsraîl li Iraqê bi piştgiriya PDK’ê ji bo berjewendiyên xwe weke xeter dibîne.
Leyla EGÎD
