Di dema dawî de êrîş û hewldanên kaosê yên li herêmên Qamişlo, Hesekê û gundewarên Kobanê yên Rojava (Bakur û Rojhilatê Sûriyê), nîşan didin ku MÎT bi navê hêzên eşîran û bi destê şaneyên veşartî yên hatine avakirin, stratejiyeke qirêj dide meşandin.
Li gorî agahiyên ku me wekî lekolin.org bi dest xistine, MÎT û îstîxbarata HTŞ ku di nav têkiliyeke berdewam de ne, plana avakirina şaneyên veşartî li Rojava û deverên derdora wê ji bo çalakiyên îstîxbarî danîne meriyetê. Herêmên ku avakirina van şaneyan lê tê kirin, bi taybetî gundewarên Til Hemis ê Qamişlo û gundewarên Hesekê ne.
Navên kesên ku me di nav sazûmana vê şaneya veşartî de nasîn û zelal kirine wiha ne:
Ebid El Rehman Amir Nûrî El Zobei, navê diya wî Selfîc El Zobei ye, nasnavê wî Ebûd e. Piştî êrîşên li ser Bakur û Rojhilatê Sûriyê, Ebid El Rehman tevlî Yekîneya Ewlehiya Giştî ya HTŞ ya li Til Berak bûye û li wir cih girtiye. Li gorî agahiyên ku me bi dest xistine, di 20’ê Nîsanê 2026’an roja Duşemê saet 22.00’an de, Ebid El Rehman bi pismamê xwe Mehmûd re bi wesayîta reş a marqeya Sentafe ya bi plaka Reqayê, li ser xeta Sifeya û Til Berak tevgeriyeke berbiçav nîşan daye û hatiye tespîtkirin ku ew ji bo avakirina şaneyên veşartî li herêmê çalakiyê dimeşînin.
Mehmûd Ferhan Ehmed El Zobei, navê diya wî Ecmiya ye, wekî kurê Miwatin El Şerîf tê naskirin. Li gorî agahiyên ku hatine bidestxistin, di 25’ê Nîsanê 2026’an de cara duyemîn, bi wesayîta reş a marqeya Avante ya bi plaka Idlibê û perdên wê girtî, çûye serdana mala mamê xwe Îsman. Di vê serdanê de bi komeke ciwanên herêmê re hevdîtin kiriye û gotûbêj kiriye ku ew tevlî sîstema şaneya ku were avakirin bibin.
Kesê din Elai Hisên Elî El Fetah e, navê diya wî Heyat e, ji eşîreta El Meiamira ye. Elai 20 salî ye û li Sifeya dimîne. Piştî hilweşîna rejîma Baas, çûye Şamê û li devera Duma ya Şamê bi Mehmûd El Ferhan re hevdîtin pêk aniye.
Li gorî agahiyên ku hatine bidestxistin, Mehmûd Ferhan di wê demê de li ber lêgerînê bû, lewma bi navê Elai derbasî Hesekê bûye, bi qasî hefteyekê li wir maye û piştre dîsa vegeriyaye Şamê. Hatiye diyarkirin ku Elai Elî El Fetah hîna li Sifeya dimîne û di heman şebekê de bi Mehmûd û Ebid El Rehman El Zobei re çalakiyê dike.
Malpera me lekolin.org di 14’ê Adarê 2026’an de di Nûçe Analîzê de ragihandibû ku çeteyên girêdayî MÎT û unsûrên DAIŞ’ê, xwe bi navê “Siwar Eleşeyîr” (Siwarên Eşîran) li herêma Til Hemis bi rêxistin dikin. Hinek ji van komên ku beşekî wan bi unîformaya hêzên ewlehiya hundirîn ên girêdayî hukûmeta Şamê tevdigerin, hatine zanîn ku ev koma kontra ya di nav hêzên ewlehiya hundirîn de hatiye avakirin ji 10 kesan pêk tê.
Her wiha hatibû gotin ku MÎT ji SMO û çeteyên DAIŞ’ê hêzên kontra ava dike û bi koordînasyona rayedarên têkildar ên di nav îstîxbarata Tirkiyê û HTŞ de, ev avahî bi navê “artêşa eşîran” tên rêxistinkirin.
