Piştî hilweşîna rejîma Şamê, dewleta Tirk ji aliyekî ve xwe wekî xwediyê HTŞ’ê nîşan dide, ji aliyê din ve tê zanîn ku hewl dide Helebê, ku di nav sînorên Misak-i Millî de dibîne, bi temamî bixe bin kontrola xwe.
Malpera me di dosyaya taybet a 13’ê Gulanê de ragihandibû ku dewleta Tirk di salên destpêkê yên krîza Sûriyê de tesîsên pîşesaziyê û kargehan talan kiribû û dizîbû, û bi navê nûavakirina Sûriyê hewl dide aboriya wê bi temamî bigire destê xwe û dest bi sîxuriya tesîsên ragihandinê kiriye.
Dewleta Tirk ku dixwaze parêzgeha Helebê bi temamî bixe bin kontrola xwe û tevlî nav sînorên Misak-i Millî bike, gavekdin din ber bi jor ve avêtiye û hewl dide beşa ragihandina leşkerî ya li herêmê bi temamî bigire destê xwe.
Li gorî agahiyên ku me wekî Lekolin.org bi dest xistine, di 8’ê Hezîranê de, heyete ji rêveberên payebilind ên MÎT’ê, li gel rêveberên Ewlehiya Neteweyî ya hikûmeta demkî, derbasî Beşa Ragihandina Leşkerî (Ewlehiya Ragihandinê) bûn, ku nêzî qereqola parêzgeha Helebê ye. Piştî civîneke kurt, ji bo tamîrkirin û veguherîna hin amûrên çavdêriyê, komîteyeke taybet hate avakirin.
Berî ku endamên saziya ragihandina leşkerî ya rejîma Baas birevin, wan hin amûr xera kiribûn. Tê zanîn ku MÎT’ê ji vê komîteyê re talîmat daye ku di demeke kurt de hemû amûr amade bikin, paşê wan li taxên Helebê belav bikin û ji bo guhdarîkirin û şopandina telefonên gumanbar talîmat dane.
Herwiha li gorî agahiyên ku me bi dest xistine, piştî civînê, rêveberên MÎT’ê û rayedarên HTŞ’ê serdana birca ragihandinê (telekomunîkasyon) ya li taxa Hemdaniyê kirine. Ev cih berê navenda polîsê leşkerî ya hêzên Rûs bû û amûrên li hundirê wê ji xizmetê derketibûn. Tê gotin ku MÎT’ê ji bo ji nû ve çalakirina vê navendê ji rayedarên HTŞ’ê re planeke xebatê pêşkêş kiriye.
Ya herî girîng jî, rayedarên MÎT’ê di civînê de ji rayedarên HTŞ’ê re ragihandine ku pêwîst e li derdora Şêx Meqsud û Eşrefiyê li ser gelek avahiyan bircên çavdêriyê werin danîn.
Dewleta Tirk, dema ku hewl dide li Helebê cihê Rûsya û Îranê bigire, bi armanca ku hemû binesaziya teknîkî bigire destê xwe, dixwaze bi temamî Helebê bixe bin kontrola xwe.
