Dewleta Tirk, ku bi rêya MÎT’ê di nav HTŞ’ê de rêkûpêkkirinên nû çêkir da ku desthilatdariya xwe li Sûriyê xurt bike û hêzek paralel li dijî desthilatdariya Şamê ava bike, tê zanîn ku peymanek veşartî bi Erebistana Suudî û Urdunê re îmze kiriye ji bo tevlêkirina wan di çalakiyên perwerdehiya leşkerî de.
Malpera me Lekolin.org di dosyaya xwe ya taybet a 18’ê Tebaxê de bi berfirehî planên dewleta Tirk ên avakirina hikûmetek teknokrat û hêzek leşkerî ya girêdayî xwe aşkera kiribû. Dewleta Tirk, bi karanîna amûrên şerê taybet, derew belav kir ku QSD’ê leşkerên rejîma kevn ber bi herêmên di bin kontrola xwe de derbas kirine. Lê di paşperdeyê de, tê zanîn ku dewleta Tirk zêdetirî mehekê ye leşkerên rejîma kevn ên berê û piştî hilweşîna rejîmê ji Sûriyê kom kirine, li baregehên Konya û Încîrlîkê perwerde dike.
Dewleta Tirk, ji bo ku van planên xwe berfireh bike û bixe meriyetê, ji ber qeyrana aborî ya ku tê jiyîn, welatên Ereb manipule kir da ku wan ji bo armancên xwe bi kar bîne û dest bi livûtevgerê kir.
Li gorî agahiyên ku me wekî Lekolin.org bidest xistine, di 20’ê Tebaxa 2025’an de dewleta Tirk bi navgîniya MÎT’ê bi Erebistana Suudî û Urdunê re civînek veşartî li dar xist. Di civînê de, ji bo fînansekirina perwerdehiyên leşkerî yên li Sûriyê û peydakirina qadên perwerdehiyê peymanek hate îmzekirin. Tê zanîn ku biryar hate girtin ku ev peyman bêyî agahdarkirina Amerîka, Fransa û Îngilistanê bi dizî bê meşandin. Piştî civînê, dewleta Tirk komek efser û îstîxbaratçiyên girêdayî xwe yên di nav HTŞ’ê de şandiye Urdun û Suudî Erebistanê.
Hûrguliyên biryarên ku di civînê de hatine girtin wiha ne: Leşker û îstîxbaratçiyên ku MÎT di nav hikûmeta demkî ya Sûriyê de hilbijartine, wê li Urdun û Suudî Erebistanê bêne bicîhkirin û perwerdekirin, û paşê wê vegerin Sûriyê. Ji bo perwerdehiya li Urdunê, Qatar wê piştgiriya aborî peyda bike, lê ji bo komên li Erebistana Suudî, wê pere ji Qatarê neyê xwestin. Fînansmana wan wê ji aliyê Suudî Erebistanê ve bê peydakirin.
LEŞKERÊN REJÎMÊ HATIN VEŞARTIN
Li gorî agahiyên ku me ji çavkaniyên pêbawer bidest xistine, dewleta Tirk di civîna xwe ya bi Erebistana Suudî û Urdunê re, mijara leşkerên rejîma kevn ên ku bi mehan perwerde kirine veşartiye. Dewleta Tirk, bi navê profesyonelkirina hikûmeta demkî ya Sûriyê, hewl dide piştgiriyê ji Erebistana Suudî û Urdunê wergire. Tê zanîn ku dewleta Tirk li baregehên leşkerî yên Konya, Adana-Încîrlîk, û her wiha li Hatay û Dîlokê (Antep) efser û leşkerên ku ji rejîma kevn a Sûriyê veqetiyane perwerde dike.
