03 Ocak 2011 Pazartesi Saat 17:19
Kampanya îmzeyan a ku di çarçoveya “Duzimanî” de ji aliyê Rêxistina BDP’ê ve hatiye destpêkirin rastî eleqeyekî mezin tê. Rêxistina BDP’a Panosê standa îmzeyan vekir. Şaredariya Dêrsîmê jî tabelayên yekîneyên xizmeta şaredariyê guhert û dimîlî lê zêde kirin.
TABELEYAN DIMILÎ (ZAZAKÎ)
Rêxistina BDP’ê ya Panosê di çarçoveya kampanyaya “jiyana duzimanî” de li ser kolana Agir-Wan standa îmzayan vekir. Serokê Rêxistina BDP’ê ya Panosê, Şaredarê Panosê Yusuf Yilmaz û endamên Meclîsa Şaredariyê stand ziyaret kirin. Şaredarê Panosê Yusuf Yilmaz, diyar kir ku ew dê zimanê kurd li her qada jiyana bikarbînin û wiha got: “Ji ber ku bê ziman jiyan nabe. Ji ber vê yekê em dê zimanê xwe li her qada jiyanê bikarbînin.” Piştî axaftinê kesên stand ziyaret kirin îmza avêtin. Gelê navçeyê jî eleqeyekî mezin nîşanî kampanyaya îmzayan didin.
LI ŞAREDARIYA DÊRSÎMÊ JÎ TABELAYÊN DIMÎLÎ HATIN DALIQANDIN
Şaredariya Dêrsîmê jî piştgîrî da “jiyana duzimanî” û tabelayên yekîneyên xwe yên xizmetê li gel tirkî dimilî jî nivîsandin. Şaredara Dêrsîmê Edîbe Şahîn têkildarî mijarê daxuyanî da û wiha got: “Projeya partiya me ya Xweseriya Demorkatîk heye û em jî şaredariya xwe lê gorî vê yekê birêve dibin. Pêkanîna vê projeyê jî rêveberên herêmî ne. Em jî li Dêrsîmê di vê çarçoveyê de xizmeta bi duzimanî dikin. Me tabelayên hemû odeyên xwe bi zaravayê dimîlî daliqandin. Em tenê bi vê yekê namînin. Ji xwe em di civînên gel de bi zimanê zikmakî di axivin. Dê xebatên me yên ziman hêj berfireh bibin.”
SALNAMEYÊN BI KURDÎ
Şaredariya Sêrtê, bi kurdî tirkî û erebî sersal pîroz kir û li gelek kolan û qadên bajar pankartên “Sersala we pîroz be” daliqand. Şaredariyê piştî vê hewldana 3 zimanî niha jî salnameyên bi 3 zimanan li esnafan belav dike. Xebatkarên Şaredariya Sêrtê salnameyên bi kurdî, erebî û tirkî li esnaf û welatiyan wekî diyarî belav dike.
BAZARA MEZIN A WANÊ TABELAYA KURDÎ DALIQAND
Esnafên Wanê di çerçoveya kampanya “Jiyana duzimanî” ya ji hêla BDP’ê û KCD’ê ve hatibû dest pêkirin, li Bazara Mezin a Gel tabelaya kurdî daliqandin. Esnafên bazara li ser Kolana Nexweşxaneyê ya li hemberî Edliyeya Wanê bi merasîmekê tabelaya kurdî daliqadin. Di merasîmê de Hevserokê BDP’ê yê Wanê Cuneyt Canîş, Şaredarê Wanê Bekîr Kaya û esnafên bazarê amade bûn.
LI ÊLIHÊ ETÎKETA BI KURDÎ Û TIRKÎ
Rêxistina BDP’ê ya Êlihê û saziyên sivîl di çarçoveya kampanya “Duzimanî” de etîketên kurdî û tirkî li esnafan belav kirin.
Piştî biryara BDP’ê û KCD’ê ya “duzimanî” li herêmê her ku diçe piştgiriya kampanyayê zêde dibe. Li Êlihê jî, Odeya Esnaf û Kiştûkalan, Rêxistina BDP’ê, Şaredarî û Şaxa KURDÎ-DER’ê, etîketên kurdî û tirkî li bazara Taxa Baglarê belav kir.
ESNAFÊN GURGUMÊ DEST BI GUHERTINA TABELAYAN KIRIN
Piştî ku BDP’ê kampanya duzimanî dest pê kir li gelek navçe û bajarên kurdan esnafên kurd dest bi guhertina tabelayan kirin û navên kurdî li tabelayên xwe kirin. Li navçeya Gumguma Mûşê jî esnafan di çarçoveya kampanya duzimaniyê de dest bi guhertina tabelayan kirin û tabelayên kurdî bi dikanên xwe vekirin. Her wiha gelek esnaf jî ji bo tabelayên xwe bikin kurdî sparîşan didin reklaman. Bi taybetî ji ber k li Gumgumê zaza û kurmanc hene tabela bi kurmancî û zazakî tên nivîsandin.-ANF
Navenda Lêkolînên Stratejîk a Kurdistanê
www.navendalekolin.com www.lekolin.org -www.lekolin.net – www.lekolin.info
