Piştî hilweşîna rejîma Esad, li Sûriyê kart ji nû ve tên kişandin. Dewleta Tirk a dagirker ku li herêmên dagirkirî yên Sûriyê demografyayê diguherîne, di çarçoveya peymanên bi Îsraîlê re hatine çêkirin de, bi piştgiriya Qeterê, ji bo zêdetir Filistîniyan li Sûriyê bicîh bike kampên nû ava dike.
Li gorî agahiyên çavkaniyên Sûrî yên ji malpera Îsraîlî i24NEWS re hatine parvekirin, li bakurê Sûriyê, nêzî sînorê Tirkiyê, du bajarokên konan ên mezin, bi piştgiriya hevpar a Tirkiye û Qeterê, ji bo ji nû ve bicîhkirina bi sed hezaran Filistîniyan tên bikaranîn.
Di nûçeyê de hate gotin ku yek ji van kampan di navbera El-Bab û Exterînê de, ya din jî li rojhilatê Ezazê ye. Ev kamp, di dema şerê navxweyî yê Sûriyê de, ji bo astengkirina çûna Sûriyên koçber li axa Tirkiyê hatine çêkirin.
Malpera me Lekolin.org, plana bicîhkirina Filistîniyan li Sûriyê du sal berê, yanî di 15’ê Mijdar û 30’ê Mijdara 2023’an de, bi du nûçeyên taybet eşkere kiribû. Li gundê Celemê yê navçeya Cindirêsê ya Efrînê, di bin çavdêriya MÎT’ê de kampa dagirkeriyê ya nû ku ji zêdetirî 4 hezar kon û xaniyan pêk tê, hate avakirin. Hate ragihandin ku dewleta Tirk a dagirker, ku di şerê di navbera Îsraîl û Hamasê de ji bo Filistînê mîtîngên piştgiriyê li dar dixe lê di heman demê de hevkarî bi polîtîkayên Îsraîlê re dike de, wê koçberên ji Filistînê hatine anîn li vê kampê bicîh bike.
Herwiha, di çarçoveya plana ku bi hevkarîya Îsraîl, Hamas û hin welatên Erebî (Kuweyt, Qeter) hatiye amadekirin de, malbatên ku bi darê zorê ji Filistînê koçber kirine, li kampên ku li El-Bab û li gundê Çeqela yê navçeya Şiyê ya Efrînê hatine avakirin, hatine bicîhkirin.
JI ALIYÊ MÎT Û MOSSAD’Ê VE TÊN RÊXISTINKIRIN
Li gorî nûçeya i24NEWS’ê ku li ser çavkaniyeke Sûrî hatiye avakirin, du rêxistinên Tirk ên bi navê Avaaz û İHH çavdêriya cîbicîkirina vê planê dikin.
Li gorî agahiyên malpera me Lekolin.org ku li ser çavkaniyên pêbawer û bi dîmenan hatiye piştrastkirin, li El-Babê, Weqfa Şexef ku rasterast ji MİT’ê talîmatan digire û bi İHH’ya ku bi dewleta Tirk a dagirker re dixebite re hevkarî dike û herwiha Weqfa Destên Spî ku girêdayî çeteyên Îxwanî ye û Weqfa Jiyana Birûmet ku bi destê MOSSAD’ê li Filistînê hatiye avakirin, bi hev re li vê kampê zêdetirî 150 malbatên koçber ên ji Filistînê hatine, bicîh kirine.
Bi vê plana mezin ku ji aliyê MÎT, MOSSAD, Hamas, Kuweyt û Qeterê ve tê fînansekirin, armanc ew e ku “Bi kevirek li çend çûkan bidin ”. Hem Filistîn ji Filistîniyan were paqijkirin, hem jî demografyaya herêmên di bin dagirkeriya dewleta Tirk de, bi taybetî Efrîn, were guhertin.
Li gorî pêvajoyê, berjewendiyên heyî zêde dibin. Tê îdiakirin ku di peymanên dawî de, bicîhkirina Filistîniyan li van kampan, parçeyek ji peymaneke berfireh e ku bi DYE’yê re hatiye çêkirin, ji bo rakirina ambargoyên li ser Şamê û naskirina rêveberiya nû.
