Çeteyên girêdayên Rejîma Şamê û Dîfa El Wetenî yên di bin navê “Hêza Eşîra” de di 7’ê tebaxê de êrîşên berfireh li ser Kantona Dêrazorê dabûn destpêkirin ji aliyê hêzên Meclîsa Leşkerî ya Dêrazorê û QSD’ê ve derbeyên mezin xwarin û neçar man paşde vekişin. Li ser vê esasî ev carê îstîxbarata Rejîma Sûriyê Muxaberat serî li rêbazekê din da û hat diyarkirin ku 3 serçeteyên (emîr) DAIŞ’ê yên ku hêj cezayê wan dawî nebuye serbest berda.
Rejîma Sûriyê û mutefikên wê ku nikarin derbeya mezin a ku di êrîşên Dêrazorê de xwarin daqûrtînin, dixwazin bi planên nû û berfirehtir bigihêjin armanca xwe. Rejîma Sûriyê ku bi taybet di heremê de bi Îranê re hevkariya xwe berdewam dike, bi riya Rûsya jî dixwaze gavên xwe yên bi nêzîkbûna dewleta Tirk a dagirker re jî lez bike.
Li gor agahiyên hatine bidestxistin, Rejîma Sûriyê ku dixwaze plana xwe ya êrîşê ya ser heremê berfirehtir bike di dîroka 9’ê Tebaxê 2024’an de 3 serçeteyên (emirên) DAIŞ’ê yên destê wan xwîna gelek mirovan de heye ku di Girtîgeha Sêdnayê de ne bê ku cezayê wan a girtinê bi dawî bibe serbest hatin berdan. Rejîma Şamê ku îdea dike têkoşîna herî xûrt wan li dijî DAIŞ’ê daye, wek e mutefikên xwe dema mijar dibe berjewendiyên wan dikare bi çeteyên DAIŞ’ê yên herî zêde destê wan di xwîna hezaran mirovan de heye re hevkariyê bike.
REJÎM EV DEMEK DIRÊJE BI RIYA ŞANEYÊN RAZAYÎ ÊRÎŞAN DIDA KIRIN
Navên 3 serçeteyên DAIŞ’ê yên ji aliyê Muxaberat ve ji Zindana Sêdnayê serbest hatin berdan wiha ne; Taha Yasîn bi navê kod Ebû Emşe, Ebû Hemze û Ebû El Leys in.
Rejîma Sûriyê ev demek dirêje wek e çewa li Dêrazore li heremên Reqa û Tebqa jî plana êrîşên cur bi cur kiriye. Di çerçoveya vê planê de li van herêman jî gelek sîxûr û şaneyên razayî birêxistin kiriye. Dem dem li van herêman ku êrîşên noqteyên QSD’ê û saziyên Rêveberiya Xweser dihatin kirin bi destê van şaneyên razayî dihat kirin.
Ev serçeteyên DAIŞ’ê ku ji aliyê Rejîma Sûriyê ve serbest hatine berdan, berê li ser erdnigarî û çeteyên DAIŞ’ê yên rojavayê Firatê hakim bûn û gelek êrîşên întîxarî û mayînê rêxistin dikirin. Ev sê emîrên DAIŞ’ê ji bo di serî de heremên Reqa, Tebqa, Minbic qadên rojavayên Firatê tora şaneyên razayî ava bikin û li dijî hêzên QSD’ê şer bikin hatine erkdarkirin.
Li gor agahiyan, rejîma Sûriyê gelek mayîn, teqemenî û çek daye çeteyê bi navê Taha Yasîn (Ebû Emşe) û ji bo çeteyên li Minbicê hatine birêxistinkirin di ser qada Esriyayê derbasî herêma Tebqayê bike hatiye erkdarkirin.
Serçeteyê bi navê Ebû Hemze jî ji ber li ser erdnigariya heremên navbêra Ebû Kemal û El Meyadîn hakim e, rejima Sûriyê ji bo hem çeteyên xwe birêxistin bike an jî komî ser hev bike û li dijî QSD’ê şer bikin gelek çek û cebilxane radestê wê kirine.
Rejîma Sûriyê ku bi taybet di herêma El Qelemon a Dêrazorê de bi rejîma Îranê re nav hevkariyeke xûrt de ye, serçeteyê DAIŞ’ê yê serbest berdayî Ebû El Leys a di wê heremî de xwedî agahî ye, ji bo bi milîsên Hizbûllahê ya Îranê re alîkar bibe hatiye erkdar kirin. Tê gotin ku Ebu El Leys di mijara sabotajê de profesyonel e.
RÛXMÊ JI CEZAYÊ WAN RE BI SALAN MAYE KU DAWÎ BIBE SERBEST HATIN BERDAN
Li gor agahiyan ev sê çeteyên DAIŞ’ê rûxmê ku ji cezayê wan re hêj bi salan maye dawî bibe ji aliyê Muxaberat ve serbest hatine berdan. Rejima Sûriyê ku dixwaze tola têkçûna xwe ya di Dêrazorê de rake, bi vê rêbazî dixwaze bi êrîşên nû ya li ser heremên Tebqa û Reqayê bide destpêkirin. Li ser vê esasî rejîma Sûriyê ku dixwaze bi destê van sê çeteyan li heremên Minbic û Reqayê hin komên çete yên nû bide avakirin, hat diyarkirin ku rejîm plan dike ku bi şertê di bin serweriya wê de bin hin çeteyên DAIŞ ên din ku girtîne serbest berde.
