Dewleta Tirk a dagirker, piştî hilweşîna Rejîma Esed, ji bo zêdekirina serweriya xwe li Sûriyê û tunekirina destkeftiyên Kurdan, li bajarê Hesekê yê di bin kontrola Rêveberiya Xweser a Demokratîk a Rojava de, ji bo têkbirina aramiyê, MÎT û îstîxbarata HTŞ’ê xistiye tevgerê.
Ji çavkaniyên pêbawer ên ku me agahî jê wergirtine, di hefteya duyemîn a Nîsanê de, li Şamê civîneke veşartî hat lidarxistin. Di vê civînê de, Serokatiya Îstîxbarata Hikûmeta Heyet Tehrîr El-Şam (HTŞ), du fermandarên leşkerî yên dewleta Tirk a dagirker û komek nûnerên eşîrên ji Hesekê beşdar bûn. Di civîna ku nêzî du saet û nîvan dom kir de, hat zanîn ku êrîşên ji bo têkbirina îstîkrarê li Hesekê û gundên derdorê hatine plan kirin. Ev êrîş dê bi koordînasyona MÎT’ê, bi riya endamên eşîran, li dijî baregehên Hêzên Sûriyeya Demokratîk (QSD) û hêzên Koalîsyonê bêne kirin.
BI NAVÊ “MERTALA CEZÎRÊ” RÊXISTINEKE LEŞKERÎ BÊ AVAKIRIN
Li gorî agahiyên ku me bi dest xistine, di civînê de biryar hat dayin ku li ser rêyên gundan êrîş li dijî QSD’ê bêne kirin û rêxistineke leşkerî ya bi navê “Mertala Cezîrê” bê avakirin. Ev rêxistin dê bi seferberkirina ciwanên di nav eşîran de û endamên ku ji QSD’ê veqetiyane, bê xurtkirin. Herwiha, tê plan kirin ku li dijî QSD’ê, bi hinceta “girtin û zindankirina” pêkhateyên Ereb, serhildaneke sivîl û leşkerî bê destpêkirin.
Di çarçoveya vê planê de ku armanc ew e ku kontrola QSD’ê li herêmê qels bike û bandora Tirkiyê li Bakur-Rojhilatê Sûriyê zêde bike, navên kesên ku MÎT’ê di nav eşîran de erkdar kirine wiha ne: Şêx Zamil El Sebîî, Şêx Hisên Emîn, Şêx Mehmûd El Madî, Şêx Sêf El Cerba, Şêx Ibrahîm Hebeş, Şêx Şaîş El Milhim, Şêx Ekrem El Meşhedanî, Şêx Mihemed Diyab û Şêx Mihemed El Hiso.
Hat ragihandin ku ev kes berê gelek caran ji aliyê serokên eşîran ve hatine hişyarkirin ku têkiliyê bi dewleta Tirk re daneynin. Tê meraqkirin ka serokên eşîran dê çawa bersivê bidin berdewamkirina têkiliyên van kesan bi dewleta Tirk a dagirker re.
