Dewleta Tirk a dagirker ku êrîş û sûcên xwe yên şer ên li dijî Rojava zêde kirine, bi rêya MÎT’ê talîmata HTŞ’ê ya ku hewl dide li Şamê hikûmeteke nû ava bike, didomîne. Hate hînbûn ku HTŞ’ê ku destpêkê bi MÎT’ê re navenda hevpar ava kir û piştre tîmeke girêdayî MÎT’ê şand Şamê, niha jî bi talîmata MÎT’ê çekên kîmyewî yên ji Rejîma Baasê mayî kom kirine.
Li gorî agahiyên ku me bi dest xistine, rêveberên HTŞ’ê yên ne Ereb, rasterast di bin talîmata MÎT’ê de tevdigerin, di hefteya dawî de dest bi komkirina çekên kîmyewî yên ji rejîma berê ya Sûriyeyê mayî kirine.
Hate hînbûn ku Çekên Kîmyewî yên ku metirsiyeke mezin li ser gelê herêmê û welatên cîran çêdike, li şaxa ewlekariya kevn a li nêzî bajaroka Sansar a Humsê û li herêma Kefer Sûsê ya Şamê hatin komkirin.
Li gor agahiyên ku hatine bidestxistin hin çekên kîmyewî li gundê Yafur ê girêdayê navçeya Qetana ya Şamê hatine bicihkirin. Lê belê hat hînbûn ku bi talîmata rayedarên MÎT’ê yên li Şamê çekên kîmyewî ji Yafur derbasî bajarê Sermada yê Îdlibê ya 7 kîlometre û nîv dûrî deriyê sînor ê Bab El-Hawa kirine.
DI NAVBÊRA MÎT Û HTŞ’Ê DE PEYMANA DANÛSTANDINA ÇEK-CEBILXANE HAT ÎMZEKIRIN
MÎT’ê li aliyekê çekên kîmyewî yên ku ji Rejîma Sûriyê ya berê mane kom dike û li ser daxwaze MÎT’ê li herêmên diyarkirî hatine bicihkirin, li aliyê din jî li gorî madeyên ku amade kirine bi HTŞ’ê re peymanên çekan îmze dike.
Li gorî agahiyên ku me ji çavkaniyên pêbawer bi dest xistine, di 12’ê Çileya 2025’an de heyeta MÎT’ê ku di nav de fermandarên payebilind ên Hêzên Çekdar ên Tirk jî hene, bi Wezîrên Parastinê û Îstîxbaratê yên hikûmeta demkî ya Sûriyeyê re hevdîtin pêk anîne.
Hate hînbûn ku di hevdîtinê de di navbera MÎT û HTŞ’ê de peymana çekan hatiye îmzekirin. Di nav çekên ku Komara Tirk a dagirker dê di berdêla pere û petrolê de ji HTŞ’ê re veqetîne: alavên giran, tangên çêkirina Tirkiyê, top, kelûpelên zirxî û çekên navîn.
Her wiha hat hînbûn ku li hemberî van çekên hatine dayîn, dewleta Tirk a dagirker wê hin çekên kîmyewî yên ku HTŞ’ê berhev kiriye, bişîne Tirkiyê.
Piştî hevdîtinê hat hînbûn ku rayedarên MÎT’ê ji bo amadekariya fermandarên bi erebî û îbranî dizanin li Navenda Operasyonê ya Enqereyê û di nava Hêzên Çekdar ên Tirkiyeyê de talîmat şandine.
Hate hînbûn ku endamên MÎT’ê yên amadekirî û fermandarên TSK’ê dê li du nuqteyan li gundê Cebata Elxeşeb a Qunetra û li nêzî gundên Xan Denûn û Kenakir ên li ser xeta Derayê bi cih bibin.
ODEYÊN GUHDARKIRINÊ Û ÇALAKIYÊ HATIN AVAKIRINA
Hate hînbûn ku MÎT’a ku bi desteka HTŞ’ê li du herêman odeyên çalakî û guhdarkirinê yên veşartî ava kir, amûrên teknîkî yên asta bilind bi cih kir.
Hat diyarkirin ku MÎT bi xwe jî dê li odeyên ku li nêzî xeta Îsraîlê hatine çêkirin, tevgerên Îsraîlê yên li herêmê bişopîne û li ser xeta sînor cîhazên teknîkê yên Îsraîlê guhdar bike. Her wiha hat hînbûn ku di odeyên hatine avakirin de 4 rayedarên girêdayî Hamasê jî amade bûne.
