29 Mayıs 2012 Salı Saat 16:59
Rageşiya di navbera Herêma Kurdistan û Iraqê de berdewam dike. Kurdên li herêmên ji Başûrê Kurdistanê hatine veqatindin bi gefên Ereban re rû bi rû dimînin. Herî dawî Şaredarê navçeya Başûrê Kurdistanê Celewleyê ji bo parastina Kurdên li vê deverê bang li gerîlayên PKK’ê kir. Berdevkê PKK’ê ragihand ku ew amade ne li her derê Kurdan biparêzin.
Rageşiya di navbera Herêma Kurdistan û Bexdayê de zêde dibe. Serokê Herêma Kurdistanê Mesûd Barzanî gotibû ku welat nikare bi “dîkdatoriyê bê birêvebirin û dixwaze Serokwezîrê Şiî Nûrî El Malikî biçe. Barzanî di her carekê de peyamên ji bo serxwebûnê dide û li hemberî firotina balefirên F16 yên DYA yên ji bo Iraqê derketibû diyar kiribû ku dibe li hemberî Kurdan bi kar bînin. Serokkomarê Iraqê jî Celal Talabanî weke helwestek li hemberî desthilatiya Malikî, ragihandibû ku ew dikare îstîfaya xwe bide.
ŞAREDAR BANG LI PKK’Ê KIR
Şaredarê qezaya Celewle Enwer Hisên roja yekşema borî, ji televizyona NRT re gotibû ku “Hêzên Pêşmerge yên nêzîkî Celewle nikarin hevwelatiyên Kurd biparêzin û bang li “gerîlayên PKK kiribû ku hevwelatiyên kurd li Celewle ji destê grubên çekdar biparêzin.
PKK: EM AMADE NE KURDAN BIPARÊZIN
Berpirsê Karên Derve yê PKK’ê Ehmed Denîz di daxuyaniya da AKnewsê de ragihand ku ew amade ne li her derê Kurdan biparêzin. Deniz jî got “Li gelek deverên Kurdistanê hinek komên çekdar ên radîkal hene ku hemwelatiyên Kurd tehdît dikin bi armanca şerê navxweyî di nav gel de derxin, hawara ji Celewla hat jî vê rastiyê piştrast dike.
Denîz bang li Hikûmeta Iraqê û Hikûmeta Herêma Kurdistanê kir ku pirsgirêkên li wan deveran çareser bikin daku biratiya di nav pêkhateyên wan herêman de biparêzin. Denîz bal kişand ser yekitiya Kurdan û got “PKK, parastina Kurdan hemûyan pêk tîne. PKK bi berpirsyariya xwe radibe û amade ye hevwelatiyên Kurd li her devereke Kurdistanê biparêze.
YAWER: DAXWAZ NE DI CIH DE YE
H er wiha, Berdevkê Wezareta Pêşmerge Cebar Yawer der barê vê banga şaredarê Celewleyê de gotibû “Li navçeyên kêşedar û şaregunda Celewle jî di nav de, tenê rê bo Hêzên Pêşmerge û Hêzên Iraqê tê dayîn ku welatiyan biparêzin û wiha berdewam kiribû ““Banga şaredarê Celewle ji çekdarên PKK re bo parastina welatiyên kulrd li Celewle ne li cih e û ne yasayî ye.
NÊÇÎRVAN BARZANÎ: ARMANCA ENFALÊ ÎRO JÎ DIDOME
Serokwezîrê Herêma Kurdistanê di merasima ji bo 730 cenazeyên Kurdan ên ku ji gorrên komî yên di dema Komkujiya Enfalê de hatibûn qetilkirin, de axivî û diyar kir ku heta niha jî pirsgirêka Kurd li Iraqê nehatiye çareserkirin.
Nêçîrvan Barzanî diyar kir ku ev kesên hatine enfalkirin, tenê ji ber sedemekê hatine enfalkirin, ew jî ew e ku ji ber k u Kurd bûn. Barzanî destnîşan kir ku dewleta Iraqê ava bû û vir ve tenê êş, şîn û nexweşî daye Kurdan û bal kişand ser têkoşîna Kurdan a li hemberî rejîma Baasê.
Nêçîrvan Barzanî bal kişand ser rewşa îro ya Herêma Kurdistanê û diyar kir ku heta niha jî pirsgirêka Kurd li Iraqê çareser bûye. Barzanî got “Armaca sereke ya Enfalê valekirina bajar û navçeyên Kurdistanê bû û wiha domand “ Tiştên li bajar û navçeyên Sadiye, Celewle, Kerkûk diqewimin, berdewama heman siyaseta erebkirinê ye. Her wiha, li hemberî helwesta hikûmeta Malikî banga hişyariyê li Kurdan kir.
KURD BI EREBKIRINÊ RE RÛ BI RÛ NE
Navçeya Celewla ya ser bi parêzgeha Diyale ye, gelek caran dikeve ber êrişên grûpên çekdar ên radîkal û di encam de gelek hevwelatiyên Kurd jiyana xwe ji dest dane û çendîn kes jî birîndar bûne. Hêjayê gotinê ye ku piştî hilweşîna rejîma Beas a Seddam Huseyîn gelek bajar û navçeyên Kurdistanê yên weke Mûsil, Şengal, Mexmûr, Kerkûk, Xaneqîn, Celewle, bi rêveberiya Iraqê ve hatine girêdan û her tim Kurd li rastî êrîş û zextan tên û bi polîtîkayên erebkirinê re rû bi rû ne.-ANF/Hewler
Navenda Lêkolînên Stratejîk a Kurdistanê
www.navendalekolin.com www.lekolin.org -www.lekolin.net – www.lekolin.info
