ŞAM – Di nav hukûmeta Şamê de tevlîhevî û nakokî tên jiyîn. MÎT hewl dide ji vê rewşê sûd wergire û bi komployan hebûna xwe li herêmê xurt bike.
Demek berê, fermandarê Ceyş El Îslam Îsam Bûweydanî (Ebû Hemam) hat girtin. Li gorî agahiyên lêkolîn.org, çeteyên Ceyş El Îslam şertek danîne: eger Îsam Bûweydanî ji zindanê neyê berdan, ew ê li Şamê li ber Sefareta Îmaratê an li qada Umewî çalakiyan li dijî Hukûmeta Colanî li dar bixin. Ji bo vê yekê sê roj dem dane.
Di 24ê Nîsana 2025an de, Îsam Bûweydanî dema ku bi pasaporta Tirkî dixwest ji Balafirgeha Dubaî derkeve derveyî Sûriyê, hat binçavkirin. Tê gotin ku girtina wî biryara Hukûmeta Colanî bû, lê MÎTê ev komplo ji berê ve bi Îmaratê û Hey’et Tehrîr el-Şam (HTŞ) re amade kiribû.
TÊKILIYÊN CEYŞ EL ÎSLAM
Ceyş El Îslam di dawiya sala 2012an de li Xûtaya Şamê hat avakirin. Fermandarê wê yê ewil Zehran Elûş bû, ku di 23ê Kanûna Pêşîn a 2015an de di êrîşeke asmanî ya Rûsyayê de hat kuştin. Piştî wî, Îsam Bûweydanî, ku di sala 1975an de li Dûmayê ji dayik bûye, di 25-26ê Kanûna Pêşîn a 2015an de wekî Fermandarê Giştî hat tayînkirin. Kom piştgiriya aborî ji Îmarat û Erebistana Siûdî werdigire. Nakokiyên di navbera Ceyş El Îslam û HTŞê de di wê demê de pir tund bûn û di pevçûnan de herî kêm 700 çete hatin kuştin.
Rola MÎTê Piştî hilweşîna rejîma Esed û serdestbûna HTŞê, MÎTê bi awayekî nerasterast Ceyş El Îslam hel kir û Îsam Bûweydanî ber bi Îmaratê ve şand. Girtina Bûweydanî bi pasaporta Tirkî li Balafirgeha Dubaî, gumanan li ser rola MÎTê di komployan de xurt dike. Tê îdiakirin ku MÎT bi rêya HTŞê û Wezareta Parastinê ya nû hewl dide alîgirên Ceyş El Îslam pasîf bike, komên çete ji holê rake û wan di bin sîwana xwe de bike yek.
Di 7ê Hezîrana 2025an de, MÎTê ferman da Hukûmeta Colanî û HTŞê ku Ceyş El Îslam bêbandor bikin û Bûweydanî radestî Îmaratê bikin. Her wiha, tîmeke taybet a MÎTê ya ji 16 kesan pêk tê, derbasî Qesra Gel a li Şamê bû û çeteyên Ceyş El Îslam bi wezîfeyên “taybet” erkdar kirin. Van çeteyan ji bo misyonên bijarte yên MÎTê tên bikaranîn.
Navên Çeteyên Girtî:
-Ebd El Helîm Nûr El Dîn El Ehmed – Gundewarê Heleb
-Ayêd Tarîq Feham – Îdlîb, bajarokê Erîha
-Îbrahîm Mehmûd El Wehûb – Îdlîb, bajarokê El Mera
-Ebd El Qadêr Ehmed Safiya – Îdlîb, bajarokê Cisir El Şixor
-Suhêl Bedir El Dîn Sultan – Îdlîb, Kefer Nubil
-Mensûr Salîm El Helîb – Hema, herêma Xan Şêxon
Ev bûyer nîşan didin ku MÎT bi rêya komplo, revandin û qetilkirinan hewl dide bandora xwe li Sûriyê xurt bike û civakê di bin kontrola xwe de bihêle.
