Bi êrîşa komên çete yên Heyat Tahrîr El Şam (HTŞ) ya 27’ê mijdarê li ser Helebê re di nava 12 rojan de ketina Şamê rejîma Baas a 61 sal hilweşiya, nîqaşên dê Sûriye’yek nû çawa be derketin holê. Li ser vê esasî li Şamê ku hikumeteke demkî hat avakirin, hevdîtinên dîplomasî û helwestên pêkateyên Sûriyê jî her çû zêde bûn. Heya niha gelek dewletan ji ber HTŞ di lîsteya terorê ya navneteweyî de ye hevdîtin li ser saziyên îstîxbaratî an jî welatên Ereb de dihatin kirin. Yek ji van jî Yekbûna Dewletên Amerîka (DYA) bû. Lê li gor agahiyên ku çavkaniyek taybet parve kir doh şandeyeke DYA li Şamê bi Serokê HTŞ’ê Muhammed El Colanî, Serokwezîrê Hikumeta Demkî ya Şamê Muhammed El Beşir û cigirên wan re hevdîtinek kirine.
Li gor agahiyan di hevdîtinê de tekiliyên HTŞ’ê ya bi Rûsya, dewleta Tirk a dagirker û DAIŞ jî di nav de li ser rewşa giştî nîqaş hatine pêşxistin. Hat diyarkirin ku pêşniyara Rêveberiya Xweser a Bakur û Rojhilatê Sûriyê ku li ser esasê tevlîkirina hemû pêkateyan a di rêveberiya Sûriyeya nû de bi cih bibin jî rojeva civînê bûye.
Hat destnîşankirin ku şandeya Amerîkî di hevdîtinê de bi israr li ser têkiliyên bi çeteyên DAIŞ’ê re rawestiyane û gotine ku ji bo aramiya tevahî Sûriyê têkoşîna li hember çeteyên DAIŞ’ê xûrt bê meşandin û her kes ji aliyê xwe ve wek peywirek bibîne.
WEK HELWEST 6 XALÊN SEREKE
Li gor çavkanî destnîşan kir ku di vê çerçoveyî de şandeya DYA’yê wek nêrîn û helwesta Waşîntonê ya ji bo avakirina Sûriyeyeke nû ku çend mijarên esasî yên nebe nabe aşkere kirine. Hat ragihandin ku ji van mijaran 6 xalên berbiçav û sereke wiha ne;
*Wek HTŞ, Hikumeta Demkî û rêveberiya ku dê pêşerojê de were avakirin, têkiliyên xwe di serî de ji El Qaîde û komên din ên radîqal qût bikin û biyaniyên ji nav xwe derbixin.
* Ji ber Hêza Sûriyeya Demokratîk (QSD) li dijî çeteyên DAIŞ’ê bi Koalisyonê re îtîfaqe nabe ku şer û pêvçûn li hember wan were kirin, her wiha hevdîtin jî bi Meclîsa Sûriyeya Demokratîk (MSD) re jî were kirin û bibin beşek ji Sûriyeya Nû.
* Hikumetek e ku hemû pêkateyên Sûriyê nûnertiya xwe tê de bibîne wer e avakirin.
* Pêwîst e Sûriyeya Nû garantî bide ku dê bi tu awayî li ser Îsraîl nebe wek e tehdît.
* Divê tu têkilî bi Hamasê re neyê danîn û hemû têkiliyên heyî jî werin qûtkirin û tasfiyekirin.
* Rêveberiya Sûriyeya Nû di hêla yasayî de divê li ser esasê laîqtiyê be, ne bi şerîatî be. Lewra Sûriye di hêla civakî û baweriyê de kozmopolîtîk e, ango pir olî û mezhebî ye.
HTŞ’ê van xalên ku şandeya Amerîkî wek e helwest rave kir, qebul kir an na nehat zanîn.
