Li gor teoriya kaosê dibêjin dema pepûle li daristanên Amazonê baskê xwe bihejîne dibe ku li Emerîkayê bahozên mezin çêbibin. Wate; gorankariyek biçûk di daneyên destpêkê yên pergalê de dikare encamên pir mezin û ne diyar bi xwe re bîne. Di gerdûnê de her tişt zindiye, diherike û bi hev ve girêdayiyê, bandor li ser hev dikin û ji hev bandor dibin. Her tişt ji guhertin û veguhertinê para xwe digre. Ji civaka mirovan bigire heya hemû hebûnên xwezayê, herdem di nava guhertin veguhertin û xwe ji nûve avakirinê de ye.
“Banga Aşitî û Civaka Demokratîk” ya ku ji aliyê Rêber Apo ve li Girava Îmraliyê hate kirin diyare ku wê wek “hejandina baskê pinpinîkê” tesîreke mezin li ser pêvajoya guhertin û veguhertinên li Kurdistan, Rojhilata Navîn û cîhanê bike. Di pergala înkar û îmhayê de guhertin çêbibin, pêşiya siyaseta demokratik vebibe, gelê Kurd wê bi nirxên xwe yên netewî jiyaneke azad û wekhev ava bike. Guhertin di pergala înkar û îmhayê de wê bandorê li ser gelê Kurd û gelên heremê bike. Ji niha ve bandora bangewaziyê li ser hemû beşên civakê diyar bûye.
Hem alîgirên aşitî û azadiyê, hem jî dijberên wî ji bangewaziya Rêber Apo bandor bûne. Di nav gelê Kurd û Tirkiyê de bandorbûyinên pozîtîf û negatif hene. Alîgirên azadî û aşitiyê armanc û çarçoveya bangewaziyê fam dikin û dixwazin li gorî wî erk û berpirsiyariyên xwe yên dema nû bi cîh bînin.
Yên dijber jî dixwazin bandor û wateya banga Aşitiya civaka demokratik berovajî bikin, lawaz nişan bidin û tevlîheviya derxînin.
Aliyên pozîtîf-erênî nêzîkî pêvajoyê dibin banga Rêber Apo weke şanseke dîrokî dibînin. Ji bo aşitî di navbera gelê Kurd û dewleta Tirk pêk were piştgiriya însîyatîfa Rêber Apo daye destpêkirin dikin. Eger li ser esasê naskirina îradeya gelê Kurd û qebûlkirina mafê gelê Kurd yên bingehîn gav werin avêtin bêgûman wê demê derfetekî mezin ji bo bi hev re jiyankirina gelan çêdibe. Demokratîkkirina Tirkiyê û azadiya gelê Kurd wê hevdu temam bikin.
Aliyê negatif-neyênî nêzikî pêvajoyê dibin nirxandinên ezber û klişe dikin. Têkoşîna azadiya gelê Kurd û Kurdistanê wekî Teror bi nav dikin, dibêjin “emê wan tune bikin”. Sed sale bi vê siyasetê xwe dubare dikin. Siyaseta nijatperestî ya ku xwe dispêre înkar û imhakirina gelê Kurd êdî li ber têkçûnêye.
Dewleta Tirk û siyaseta nijadperest ji ber xwe ve nehat vê astê! Têkoşîna azadiya gelê Kurdistanê ya ku di pêşengiya Rêber Apo û PKK‘de pêşket wan neçarî çareseriyê dike. Yan wê çareseriya demokratik qebûl bikin, yan jî wê deriyê têkçûyinên mezintir ji bo wan werin vekirin. Ji rewşa şer tenê gelê Kurd zerarê nabîne, ji gelê Kurd zêdetir dewleta Tirk û gelê Tirkiyeyê zerar bibine. Di berdewamkirina şerê azadiyê de dibe ku gelê Kurd berdelên girantir bidin, lê dewleta Tirk dê hilweşe.
Yên dixwazin pêvajoya ku Rêber Apo bi berpirsiyariyekî dîrokî daye destpêkirin berovajî bikin dibêjin; “Em ê PKK’ê teslîm bigirin.” Hinekên din jî dibêjin “PKK teslîm dibe.” Herdû grûp jî ji heman kaniya nijatperestiyê avê vedixwûn. Bi dogma û ezberan diaxivin û tevdigerin. Li cem wan kesan tekane rê siyaseta kuştin û qirkirinê ye. Dixwazin di bin navê milîyetgeriyê de têgîn û têgehên ji bo aşitî û azadiyê tên bikaranîn şêlû bikin û tevlîheviyan derxînin. Aliyên ku hemû siyaseta xwe li ser înkar û qirkirina gelê Kurd avakirine hewl didin pêvajoyê vala derxînin û nakokiyan di sere herkesi de çêbikin.
Tişteke din a balkêş ew e ku aliyên ji aşitiyê ditirsin, dibêjin; “Heger dewlet bi Kurdan re li hev bike wê nasnameya Tirkbûyinê ji dest biçe”
Hinek aliyên Kurd jî bi heman şêwazî ji banga aşitiyê ditirsin dibêjin; “PKK dev ji Kurdbûyinê ber dide.”
Ev her dû tirs di berdewamkirina şer û pêvçûnan de digihêjin hev. Hebûna rêyekî din nafikirin. Ji hevdu bandor dibin û bertek nîşanî hev didin. di nav çembera bandor û bertekê de dimînin û xwe dûbere dikin.
Rêber Apo di paradigmaya modernîteya demokratik de her tim bahsa rêya sêyemîn dike. Rêya sêyemîn çiye? Rêya aşitî û avakirina civaka demokratik e. Ev di siyasetê de jî wisaye. Gelê Kurd ne mahkumê bijardeyên siyaseta ku çareseriyê bi xwe re nayne.
Heger li Tirkiye û Bakurê Kurdistanê projeya Aşitî û Civaka Demokratîk bi ser bikeve hemû parçeyên Kurdistanê wê sûdê jê bigirin. Ji niha ve bandora çareseriya îhtîmal bipêşbikeve li ser Başûrê Kurdistan û Iraqê Rojavayê Kurdistanê û Suriyê, Rojhilatê Kurdistan û İranê kiriye.
Yên Rêber Apo û hereketa azadiya Kurdistanê nas nakin şîroveyên bê serûber dikin. Banga Fesihkirina PKK wek tasfiyekirina hereketa azadiya Kurdistanê bi nav dikin. Heger ev nirxandin ji nefamkirinê nebe xeletiyeke mezin, xapandin û nirxandinekî niyet xirabiyê ye. Li hember berpirsiyariyên dîrokî sûce.
Rewşa îro ya cîhanê, bûyerên niha li Rojhilata Navîn diqewimin, şerê PKK û dewleta Tirkiyeyê nirxandinên nû dixwazin. 40 sal zêdetire PKK bi dewleta Tirkiyê re di nava şerekî man û nemanê de ye. Di nav 40 salî de serkeftin û deskeftiyên mezin çêbûn. Gelê Kurd qebristana ku serê wî hatibû betonkirin parçe parçe kir. Bi şerê azadiyê rastiya xwe, hebûna xwe bi hemû cîhanê da qebûlkirin. Îro gihiştiye astekî wisa ku êdî tu hêz nikare hebûna gelê Kurd înkar bike. Zincîrên înkar û îmhayê hatin şikandin. Di serî de li Rojava nirxên pir mezin û pîroz hatin avakirin. Bi milyonan Kurdê azad hatiye afirandin. Kîjan hêz dikare dilê bi milyonan kurdî bide rawestandin. Pirsgirêka gelê Kurd û şerkirinê tuneye. Li Bakur, Rojava û hemû çiyayên Kurdistanê hemû cîhanê dît keç û xortên Kurdistanê çawa şer dikin!
Êdî pêwîstî bi aşitiyeke mayinde heye. Şert û mercên heyî aşitiya civaka demokratîk li ser heremê ferz dike.
Eşkere bûye ku bi elimandinên berê çareserî pêşnakeve. Xitimandinekî ku dubare dike û dirizîne heye. Eger em rewşa îro ya Rojhilata Navîn û Kurdistanê bi têgihiştina bist sal a berîya niha bigirin dest dibe ku em rûbirûyê xeletiyan werin. Heger guhertin û veguhertin di şert û mercên berê de çêbûbin wê demê pêwistî bi nûkirina amûrên têkoşînê jî dibe. Nabe bi amûrên kevn têkoşîna nûjen were meşandin. Her “Hertişt diguhere, di nav çemê ku diherike du caran nikarî xwe bişoy. Ji ber ku cara duduyan ne tu heman kesî, ne jî av heman av e.”(Heraklîtos)
Yên li gor ruhê demê tevnegerin, guhertin û veguhertinan bixwe re çênekin nikarin li ser piya bimînin. Ji bo mirov li gor ruhê demê tevbigere pêwîste serdema ku têde jiyan dike baş nas bike. Her serdemekî taybetmendiyên xwe yên siyasî, leşkerî, aborî û civakî hene. Dem diherike û herikandin guhertinan bi xwe re tîne. Di şêwazê jiyan, şer, siyaset, rêxistinbûyin û rêvebiriya civakan de guhertin çêdibin.
Her tiştê ku neherike, neguhere û xwe nû neke dirizê, genî dibe û dimire. Ev rastî ji bo hemû civak û fikrê mirovan wisaye. Dîroka mirovahiyê de çiqas guhertin û veguhertin di jiyan û elimandinên civakan de çêbûne!?
Bi sedan sîstem hatine avakirin û xirabkirin!
Rêber Apo pirsgirêka ku bûye wek girêka kor a “Gordîon” hewl dide bi şûrê aşitî û demokrasiyê ji holê rake. Dixwaze bi rê û rêbazên nû, bi hêza zanistên civakî, bi ferasetên fireh, bijardeyên dewlemend, bi tecrûbeyên salan û bi cesaret çareser bike.
Heger pêngava aşitî û çareseriya demokratik bi ser bikeve di serî de gelê Kurd û Tirk, hemû gelên Rojhilata Navîn wê nefesekî baş bigirin.
Çareseriya pirsgirêkên netewî û civakî bi qasî ku heremîye ewqas jî gerdûniye. Însiyatîfa çareseriyê ya Rêber Apo li İmraliyê daye destpêkirin bi Kurdistanê ve sînordar namîne wê hemû Rojhilata Navîn û cîhanê bandor bike.
Baskê aşitiyê ya ku Rêber Apo li İmraliyê dihejîne di serî de li Bakurê Kurdistan, hemû parçeyên Kurdistanê û Rojhilata Navîn wê bahoza aşitî û azadiyê rake.
Yên Rêber Apo nasdikin û dîroka PKK’ê xwendine dizanin nirxên ku îro hatine avakirin bi ked û berdelên pir mezin hatine avakirin. Di avakirina Kurdê azad de keda bi hezaran şehîdên Kurdistanê heye.
Mafê herkesî yê axaftin û analîzkirina pêvajoyê heye. Baweriya hîç Kurdekî bi dewleta Tirkiyê nayê. Rewşekî pir normale. Sed sale dewleta Tirk xwestiye gelê Kurd tune bike. Heger baweriya kurdan bi dewletê were wê demê mirov şik û gûman ji aqlê Kurdan bike. Lê ev nayê wê wateyê ku Kurd bijardeya aşitiyê neceribînin. Aşitî di navbera dijminan de çêdibin. Di siyasetê de “dostanî û dijminatî heta hetayî nîne.”
Pêwîste her Kurdekî welatparêz hemû nirxandinan di parzûna nirxên netewî û demokratîk re derbas bikin û wisa xwe bigihîne encaman.
Guherandina rêbaz û şêwazê têkoşînê nayê wateya rawestandina têkoşîna azadiya Kurdistanê. Xwe nû kirin, bi demê re guncandin û li gorî pêwistiyên demê tevgerîn wê bi xwe re serkeftinê bîne.
PKK’ê xizmetek pir mezin di avabûna hişmendiya welatparêzî, netewî û niştimanî ya gelê Kurdistanê de kiriye. Hişmendiya ku PKK’ê avakiriye heta Kurd hebin wê xizmetê ji gelê Kurd û mirovahiyê re bike.
Yên hişê xwe teng bigirin, bi şêwazekî hestiyarî pêvajoyê bişopînin nikarin encamên rast ji pêvajoyê derxînin. Hêz û hişmendiya dîroka têkoşîna azadiya Kurdistanê bigirin nav dilê xwe û wisa tevbigerin.
Ev ne dawiya têkoşîna azadiyê ye destpêkek nû ye. Rêyek nûye, rûyek nûye. Şanseke ji bo aşitiyê.
Hîwa AZAD
